Filmfonds

Nederlands Filmfonds ta e fondo di reino pa kultura pa e sektor profeshonal i independiente di pelíkula na Hulanda i e parti karibense di Reino i ta duna kontribushonnan finansiero pa desaroyo, realisashon i distribushon di produkshonnan di pelíkula i aktividatnan di pelíkula.  

Loke nos ta hasi

Filmfonds ta finansiá pelíkulanan ku ta kontribuí na un oferta di pelíkulanan hulandes variá i distintivo pa un públiko diverso. Esei ta nifiká ku nos ta hasi produkshonnan posibel ku tur sorto di diferente storianan, pa grandi i chikitu, e fanátiko di pelíkula, pero tambe e baidó di sine okashonalmente, den tur skina i region: for di Maastricht te Texel, for di Groningen te Boneiru. For di nos enkargo sosial, nos ta stimulá kultura di pelíkula den e sentido mas amplio di palabra: for di pelíkula te na realidat virtual (VR), for di pelíkulanan eksperimental te na pelíkulanan pa mucha i famia, for di dokumentalnan te na animashon te na sentronan di edukashon di pelíkula i lugánan regional kaminda artistanan por bini huntu i interkambiá. No solamente nos ta enfoká riba kreadornan probá, pero tambe nos ta stimulá talentonan prinsipiante i bosnan nobo ku nunka a yega di tende.   

Banda di produkshonnan di pelíkula, nos ta finansiá aktividatnan di pelíkula riba tereno di desaroyo di talento i edukashon di pelíkula na Hulanda kompletu. E aktividatnan di pelíkula akí ta forma un base balioso kaminda pelíkulanan i trahadónan di pelíkula por floresé. E aksesibilidat di e oferta di pelíkula hulandes ta para sentral den esaki. Tambe nos ta fortifiká e infrastruktura regional pa oumentá aksesibilidat di e sektor di pelíkula pa e trahadónan di pelíkula di den Reino Hulandes i pa engrandesé kuentanan for di den region.  

Aktividatnan internashonal

Filmfonds ta organisá aktividatnan internashonal dirigí riba ampliashon i profundisashon di e ret internashonal di e sektor i profilashon di talentonan i proyektonan den laboratorionan internashonal, festivalnan i merkadonan di ko-produkshon. E Netherlands Film Commission, e punto di servisio pa produktornan estranhero ku ke realisá (parti di) nan produkshon na Hulanda, tambe ta kai bou di e departamentu internashonal.  

SEE NL

Pa e promoshon internashonal di pelíkula hulandes, nos ta traha huntu ku Eye Filmmuseum bou di e nòmber SEE NL. SEE NL ta aspirá pa oumentá e visibilidat di pelíkulanan hulandes i pa mehorá e posishon di pelíkulanan hulandes riba merkado internashonal. SEE NL ta presente na festivalnan di pelíkula internashonal i merkadonan di produkshon komo punto sentral di konosementu i kontakto pa sine hulandes.