Literatura Karibe
Pa ken?
Bo por entregá un petishon pa e areglo akí si bo ta establesé den e parti karibense di Reino i:
- bo ta aktivo komo outor*, poeta (di presentashon), traduktor literario, ilustrador, artista di arte di palabra, artista di slam òf eskritor dramátiko
- komo organisashon bo ta organisá aktividatnan literario, manera un festival òf eventonan pa promoshon di lesamentu
- komo organisashon bo ta publiká obra literario, den forma di buki, òf den un proyekto, manera un obra di teatro òf podcast
- komo organisashon bo ta yuda desaroyá talento dor di duna guia den skirbimentu, tradukshon, redakshon (final) òf presentashonnan riba tarima
*ku tin un profeshon òf tin e ambishon di tin un profeshon den kreashon òf tradukshon di literatura
Pa kiko?
E supsidio ta destiná pa diferente inisiativanan riba tereno di literatura den tur género: novela literario, kuentanan, kolekshonnan di poesia, arte di palabra, tekstonan di arte dramátiko, no-fikshon literario, literatura pa mucha i literatura hubenil. Riba papel, tarima òf den forma digital.
E fondo ta distinguí tres kategoria:
1. Kreashon di obranan literario nobo
Por trata aki di un beka pa trabou/honorario pa skirbi un teksto literario nobo. Òf pa e gastunan di tradukshon di un teksto literario eksistente pa òf for di papiamentu, tambe si ta trata di edishonnan multilingual. Bo por hasi petishon tambe pa gastunan di redakshon/guia, pa produkshon (diseño, ilustrashon, impreshon), alkanse públiko/presentashon i distribushon. I e gastunan di produkshon di proyektonan literario interdisiplinario òf multimedia.
2. Desaroyo di talento
Aki ta trata e desaroyo profeshonal di kreadornan literario. Por ehèmpel, pa establesé òf partisipá na tayernan òf kursonan riba tereno di skirbimentu kreativo i tayernan di tradukshon literario. Esaki ta inkluí tambe guia, mentorado, coaching, skol i trayektonan ku ta train e trainer. Ademas, bo por pidi supsidio pa un plan di investigashon den kual abo komo kreador literario ta investigá e posibilidatnan i e faktibilidat di bo ambishon literario. Por ehèmpel: e elaborashon di un idea pa un buki tantu riba un nivel di kontenido i artístiko, komo riba un nivel komersial: ken ta bai publik’é, ken ta hasi e redakshon, kiko ta e gastunan di publikashon. Por último, e gastunan di residensia òf gastunan di biahe por ta un parti modesto di un petishon pa supsidio.
3 Aktividatnan literario
E supsidio ta pa organisashonnan ku ta ehekutá aktividatnan públiko riba tereno di literatura. Por ehèmpel, organisá festivalnan, kompetensianan di skirbi, programanan literario online i offline, literatura den bario i eventonan ‘open-mic’. Esaki por inkluí aktividatnan di promoshon di lesamentu ku ta tuma lugá tantu paden komo pafó di sala di skol, pa grandi i chikitu, manera den biblioteka.
Un petishon por bai tokante un kategoria, pero tambe tokante diferente kategoria na mesun momentu.
Kuantu?
Kreadornan literario individual por pidi un supsidio máksimo di € 25.000, organisashonnan kultural por pidi un supsidio máksimo di € 50.000.
Kon i ki ora por hasi petishon?
Bo por hasi petishon via di un formulario online via e wèpsait di Nederlands Letterenfonds. Paga tinu: bo no por warda e formulario miéntras ku e no ta yená kompletamente. Bo ta risibí un konfirmashon via e-mail. E fondo ta trata solamente petishonnan kompletamente yená. Si bo petishon ta kompletu, e ta keda entregá na e konsehero(nan). Por entregá aplikashonnan for di 15 di yanüari 2025.
Aki bo ta haña mas informashon tokante entrega di un petishon na Nederlands Letterenfonds.
Bo por haña mas informashon tokante e kondishonnan, kriterionan di evaluashon i e informashon ku nos mester pa tratamentu di bo petishon via e boton aki bou riba e wèpsait di Letterenfonds. E informashon akí ta disponibel na hulandes, ingles, papiamentu i papiamento.
Preguntanan & kontakto
Bo tin pregunta tokante e areglo aki òf tin algu ku no ta kompletamente kla? Por fabor tuma kontakto ku e persona di kontakto riba e página aki.
