Areglo pa sentronan di músika riba tereno di pòp, hephòp i baile

Pa ken?

E supsidio akí ta pa organisashonnan i inisiadónan individual ku ta stimulá desaroyo di talento den pòp, hephòp i músika di baile den e parti karibense di Reino. 

E siguientenan por hasi petishon pa e supsidio: 

• Organisashonnan
  Organisashonnan ku ta establesé den e parti karibense di Reino (Aruba, Kòrsou, Sint Maarten, Boneiru, Sint Eustatius òf Saba) i ku ei ta stimulá desaroyo di talento riba tereno di pòp, hephòp i músika di baile.Organisashonnan ku ya ta risibí un supsidio institushonal di vários aña di OCW, òf un supsidio di vários aña pa produkshon òf festival 2025-2028 di Fonds Podiumkunsten, no por entregá petishon.
• Inisiadónan individual
  Personanan natural (manera personanan ku ta traha independiente i sin personal) ku ta biba i traha den e parti karibense di Reino i ku for di un práktika profeshonal ta guia talentonan ku tambe ta biba i traha ei. Inisiadónan individual no por hasi petishon pa supsidio pa nan propio desaroyo artístiko. E supsidio ta pa aktividatnan ku ta dirigí riba guia di talentonan. 

Pa kiko?

E supsidio ta pa aktividatnan ku ta dirigí riba desaroyo di talento den músika pòp, hephòp i baile. Músika pòp ta enserá tambe géneronan popular regional manera tumba, zouk, soca i kompa. 

E por trata aktividatnan ku ta kontribuí na e desaroyo artístiko i profeshonal di talentonan i nan presentashon den e esena musikal lokal. 

Ehèmpelnan di aktividatnan ta: 

• kreamentu di posibilidatnan pa investigashon i desaroyo 
• hasi presentashonnan posibel 
• ofresé guia artístiko i profeshonal 
• dunamentu di tareanan 
• ofresé residensianan 

Desaroyo di talento no ta trata solamente artistanan riba tarima. Funshonnan tras di kortina, manera ròlnan di produkshon, organisashon òf tékniko tambe por forma parti di e proyekto. 

E aktividatnan ta dura un mínimo di 12 luna i un máksimo di 24 luna. E periodo ta kuminsá riba e dia despues ku a anunsiá e desishon tokante e supsidio. 

E petishon mester ta dirigí riba e práktika di músika profeshonal i no riba arte amatùr, aktividatnan di bienestar òf aktividatnan di tempu liber. 

Kuantu?

E suma di e supsidio ta un máksimo di: 

• € 40.000 pa personanan hurídiko (manera fundashonnan i asosiashonnan sin intenshon lukrativo) 
• € 20.000 pa inisiadónan individual (personanan natural, inkluyendo personanan independiente sin personal) 

Por gasta un máksimo di 25% di e suma di supsidio na gastunan organisatorio i gastunan fiho. 

Kon i ki ora por hasi petishon? 

Por hasi petishon pa e presupuesto disponibel pa e parti karibense di Reino riba un base kontinuo. 

Ta trata e petishonnan na sekuensia di entrega, mientrastantu tin presupuesto disponibel. Ta trata solamente petishonnan ku ta kompletu i ku a keda entregá na tempu. 

Bo ta entregá bo petishon via Mi Fondo. Pa esaki bo tin mester di un kuenta di Mi Fondo. 

Bo no tin un kuenta ainda? Tene kuenta ku ta dura un promedio di dos dia di trabou promé ku bo kuenta ta aktivo. 

Promé ku bo entregá bo petishon, lesa e areglo kompletu riba wetten.overheid.nl i e splikashon parti abou riba e página akí. 

Ta bon pa sa

E aktividatnan mester ta dirigí riba desaroyo di talento den e práktika di músika profeshonal. 

Mester tin eksperensia demostrabel ku desaroyo di talento den músika pòp, hephòp i/òf baile. Ku esei un òf mas talento ta keda guiá den nan desaroyo artístiko, desaroyo profeshonal i presentashon. 

Ta evaluá e petishon riba:

• Eksperensia i kalidat di e petishonario 
  E petishonario tin eksperensia demostrabel ku desaroyo di talento den músika i por motivá esaki.
• Kontribushon na desaroyo di talento i presentashon
  E petishon ta mustra kon talentonan ta desaroyá nan mes profeshonalmente i kon nan ta keda presentá den e infrastruktura lokal di músika.
• Motivashon finansiero
  E presupuesto ta realístiko, ta kuadra ku e plan i ta bon motivá. 

Paga tinu: ta nenga un petishon ora ku e evaluashon di e reflekshon di e petishonario tin tres òf mas punto di krítika riba e kriterionan di evaluashon. 

Konseptonan di petishon
Bo ke tèst delantá si bo plan ta kuadra? E ora ei bo por laga lesa un konsepto di e petishon te mas tardá tres siman promé ku e momentu riba kual bo ke hasi entrega. Por e-mail un konsepto di e petishon na: muziekhubs@fondspodiumkunsten.nl 

Bo por haña mas informashon tokante e kondishonnan, kriterionan di evaluashon i e informashon ku nos mester pa tratamentu di bo petishon via e boton aki bou riba e wèpsait di Fonds Podiumkunsten. E informashon akí ta disponibel na hulandes i ingles. 

Mas informashon

Preguntanan & kontakto

Bo tin pregunta tokante e areglo aki òf tin algu ku no ta kompletamente kla? Por fabor tuma kontakto ku e persona di kontakto riba e página aki.