Entregá un petishon na Mondriaan Fonds
Riba e wèpsait di Mondriaan Fonds bo por hasi petishon pa un kuenta, kual bo tin mester pa por entregá un petishon. Esei ta konta solamente si bo no a hasi esaki anteriormente. Tene kuenta ku un periodo di tratamentu di 3 luna for di e momentu ku a entregá e petishon kompletu. Sinembargo, debí na e kantidat grandi di petishon na e fondo, e periodo di tratamentu por dura mas largu. No por otorgá un kontribushon ku forsa retroaktivo. P’esei mester hasi e petishon basta tempu promé ku e fecha di inisio deseá. E komishon di konseho ta konsehá e direktiva di Mondriaan Fonds si ta otorgá un kontribushon òf nò.
Prosedura
- Petishonarionan ta entregá un petishon via e sistema di petishon, kaminda e petishonario ta haña e eskoho pa entregá e petishon na hulandes òf ingles. Dependiendo di e eskoho akí, e vershon hulandes òf ingles di e formulario di petishon ta habri.
- Algun areglo di Mondriaan Fonds tin un fecha final. Wak e título ‘Kon i ki ora por hasi petishon?’ den e splikashon online di e areglo. Sòru pa bo entregá e petishon promé ku e fecha final.
- Despues di entregá e petishon, Mondriaan Fonds ta kontrolá si e petishon ta kompletu. Si e petishon no ta kompletu, e empleadonan di e ofisina di supsidio lo tuma kontakto ku bo. Despues di esei e petishonario ta haña e oportunidat pa, denter di 5 dia di trabou, yena e petishon kompletamente. Si e petishon no ta kompletu, lamentablemente nos lo no por atendé esaki.
- Si e petishon ta kompletu i ta kumpli ku e kondishonnan ku ta stipulá den e splikashon online di e areglo i e kondishonnan general, e petishonario ta risibí un konfirmashon via e-mail.
E komishon di konseho ta konsehá e direktiva di Mondriaan Fonds si ta otorgá un kontribushon òf nò. Ta manda e desishon di e direktiva via e-mail i pòst pa e petishonario denter di 3 luna despues di e fecha final di e ròndu di petishon. Si e areglo no tin un fecha final, ta manda e desishon di e direktiva via e-mail i pòst pa e petishonario denter di 3 luna despues di entregá e petishon.
Evaluashon
Ta presentá e petishon na e komishon ku ta duna konseho tokante e kontenido i si ta otorgá un kontribushon segun e areglo relevante. E komishon di konseho ta evaluá a base di e kriterionan manera esakinan ta indiká den tur splikashon online bou di e título ‘Evaluashon’.
Por otorgá un kontribushon solamente si e komishon di konseho evaluá e petishon positivamente. E direktiva di Mondriaan Fonds por pidi e komishon di konseho pa kompará e proyektonan ku a evaluá positivamente, ku otro. Den e komparashon akí e diversidat di proyektonan, distribushon den region i un repartishon balansá entre e diferente sorto di proyektonan ta hunga un ròl. E direktiva por disidí tambe pa otorgá un kontribushon mas abou ku loke a pidi en konekshon ku e presupuesto disponibel.
