Edukashon kultural pa e parti karibense di Reino 2025-2028: Kòrsou, Aruba i Sint Maarten
Pa ken?
E siguientenan ku ta establesé na Kòrsou, Aruba òf Sint Maarten por hasi petishon pa supsidio:
- un institushon kultural
- un profeshonal independiente ku ta aktivo riba tereno di edukashon kultural pa por lo ménos dos aña
E petishon semper ta pa e kolaborashon entre e petishonario i un òf mas skol. Tantu e petishonario komo e skolnan ta establesé riba e mesun isla.
Pa kiko?
Eksplorashonnan
Nos ta sostené eksplorashon di un kolaborashon entre un institushon kultural òf profeshonal i un òf mas skol. Ta trata aki di aktividatnan manera kombersashonnan, desaroyo di plannan, promoshon di ekspertisio, trahamentu di palabrashonnan tokante entre otro e kontenido, divishon di tareanan i finansiamentu i purba aktividatnan. E eksplorashon ta dirigí riba edukashon kultural pa e alumnonan di e skolnan.
Proyektonan
Nos ta sostené desaroyo i ehekushon di un proyekto edukashonal kultural dor di un kolaborashon entre un institushon kultural òf profeshonal i un òf mas skol. Ta trata aki di aktividatnan manera desaroyo, preparashon, ehekushon i evaluashon di e proyekto edukashonal kultural. E base di e proyekto ta e demanda di e skol òf skolnan. E proyekto ta dirigí riba edukashon kultural pa e alumnonan di e skolnan.
Por hasi petishon tambe pa proyektonan di edukashon ku ta dirigí riba kreashon di kontenido digital (arte nasí den forma digital) òf kaminda teknologia digital ta un instrumento den e proseso edukashonal kultural (por ehèmpel, trahando ku inteligensia artifisial).
Kuantu?
Eksplorashonnan
€ 5.000 – 15.000 – E proyekto ta dura un mínimo di dos luna i un máksimo di un aña. E proyekto no ta kuminsá promé ku ocho siman despues di a entregá e petishon. I e proyekto ta kuminsá denter di seis luna despues di a honra e petishon.
Proyektonan
€ 15.000 – 50.000 – E proyekto ta dura un mínimo di dos luna i un máksimo di dos aña. E proyekto no ta kuminsá promé ku ocho siman despues di a entregá e petishon (pa proyektonan riba € 25.000 esaki ta diestres siman). I e proyekto ta kuminsá denter di seis luna despues di a honra e petishon.
Nos ta supsidiá 100% di e gastunan total di e proyekto.
Kon i ki ora por hasi petishon?
Por hasi petishon for di 2 di yüni 2025 te 9 di desèmber 2026.
Ta bon pa sa
- Edukashon kultural ta nifiká edukashon di patrimonio tambe. Por inkluí kolaborashon internashonal tambe den e petishon, si esaki lo mehorá e kolaborashon lokal.
- Komo Fondo nos ta dirigí nos mes riba e impakto i e efektonan ku ta logra ku e proyektonan. E efektonan deseá ta otro pa kada areglo di supsidio. Den bo petishon, nos ke sa kon bo ta logra e efektonan akí i kon bo ta inkorporá bo grupo di enfoke den esaki. Den e areglo di supsidio ta deskribí kiko nos ke men ku e efektonan akí.
- Eksplorashonnan: Bo ta traha riba e efektonan: kolaborashon i igualdat di oportunidat.
- Proyektonan: Bo ta traha riba e efektonan: desaroyo kreativo, konekshon i igualdat di oportunidat.
Kondishonnan
- Bo ta apliká e tres kódigonan kultural, manera deskribí den artíkulo 1.6 di e areglo di supsidio.
- Tantu denter di e Eksplorashonnan komo denter di e Proyektonan, lo honra un máksimo di dos petishon pa kada petishonario.
- Ta trata petishonnan na sekuensia ku a risibí nan, te ora ku yega e final di e presupuesto. P’esei, kuminsá na tempu; no warda muchu largu pa hasi petishon.
Bo por haña mas informashon tokante e kondishonnan, kriterionan di evaluashon i e informashon ku nos mester pa tratamentu di bo petishon via e boton aki bou riba e wèpsait di Fonds voor Cultuurparticipatie. E informashon akí ta disponibel na hulandes.
Preguntanan & kontakto
Bo tin pregunta tokante e areglo aki òf tin algu ku no ta kompletamente kla? Por fabor tuma kontakto ku e persona di kontakto riba e página aki.
