Kreadornan literario ku ya ta manifestá nan mes profeshonalmente riba tereno di literatura i ku a komprometé nan mes na un partner di presentashon.
Pa kiko?
Bo por hasi petishon pa un obra literario nobo den kualke forma, basta e no ta un buki (òf un publikashon di revista). Banda di esaki bo por usa un parti di e montante pa bo desaroyo profeshonal. Bo por pensa riba guia, entrenamentu òf edukashon. Gastunan di biahe i estadia ku bo ta hasi den kuadro di e proyekto tambe por wòrdu finansiá ku e beka.
Kuantu?
€ 5.000 òf € 10.000
Kon i ki ora por hasi petishon?
Por hasi petishon na kualke momentu di aña via e sistema di petishon online di Letterenfonds.
Aki bo ta haña mas informashon tokante entrega di un petishon na Nederlands Letterenfonds.
Ta bon pa sa
Si bo obra nobo ta un deklamashon riba tarima, ta spera di bo ku abo komo eskritor mes ta deklamá bo teksto. Bo no ta hasi esaki? E ora ei wak e areglo Kontribushon pa Obra Teksto di Teatro. Pa otro tipo di obra, manera un podcast òf un proyekto oudiovisual, no nesesariamente bo mes tin ku interpretá bo obra.
Pa por entregá un petishon, bo mester por mustra por lo ménos un proyekto (literario) òf un obra. Bo mester demonstrá tambe ku bo a risibí un kompensashon pa esaki. Bo obra anterior por ta un buki òf un publikashon den un revista literario tambe. Ta evaluá e obra ku bo manda ku bo petishon pa haña un bista di e kalidat literario di bo obra. Esaki ta wòrdu hasí pa konseheronan eksterno, ku ta eksperto riba e tereno spesífiko akí.
Tin algun kondishon mas pa e obra ku bo por manda huntu ku e petishon: ora ta trata di un publikashon di revista e mester ta un publikashon den un revista literario supsidiá pa Letterenfonds. Si bo manda un buki ku e petishon e mester a wòrdu publiká ku un kontrato modelo serka un publikadó literario regular. Si ta trata di partisipashon na un programa di un festival literario òf un organisashon (manera un presentashon riba tarima, podcast òf un produkshon digital) esaki mester ta un organisashon ku a risibí supsidio di Letterenfonds.
Den e areglo akí bo por entregá un petishon si komo kreador bo ta manifestá bo mes profeshonalmente kaba riba tereno literario i si tin un partner di presentashon (por ehèmpel un festival literario òf un emisora; wak aki bou) ku lo bai presentá bo obra nobo i lo bai trese esaki na atenshon di públiko, ku lo paga bo un kompensashon pa esei, i ku lo sostené bo i guia bo den kreashon di bo obra nobo.
Tin un límite di entrada. Esaki ta € 45.000 na entrada fiskal kolektivo, i ta inkluí posibel supsidio ku a keda otorgá. Si bo gana mas den 2024, e ora ei probablemente no tin sentido pa entregá un petishon.
Petishonnan anterior
Si bo petishon no wòrdu tratá pa motibunan ofisial, bo ta haña chèns pa entregá un petishon mehorá despues. Si a rechasá bo petishon, bo por entregá un petishon nobo te ora ku bo tin obra nobo ku bo por laga evaluá.
Si a honra bo petishon, bo no por entregá un petishon nobo te ora ku e resultado final keda kompartí ku un públiko konforme e plan i te ora ku e trayekto di desaroyo ku posiblemente a keda honrá a wòrdu finalisá. Bo ta manda e resultado final di bo promé petishon huntu ku e petishon nobo (i lo wòrdu evaluá dor di e konseheronan).
Bo por haña mas informashon tokante e kondishonnan, kriterionan di evaluashon i e informashon ku nos mester pa tratamentu di bo petishon riba e wèpsait di NederlandsLetterenfonds. E wèpsait akí ta disponibel na hulandes i ingles. Tene kuenta, nos wèpsait na ingles no ta un tradukshon di e wèpsait hulandes, si no un wèpsait fundamentalmente otro, dirigí riba un públiko di eksterior.
Sinti bo liber pa eksplorá esaki. Tras di kortina ta trahando ainda riba e wèpsait. Komienso di 2025 e wèpsait lo ta kompletu. Bo ke keda na altura di e desaroyonan? E ora ei inskribí pa e notisiero.
