Programa proyektonan urbano
Pa ken?
E Programa proyektonan urbano ta dirigí riba artistanan ku ta krea presentashonnan di músika, teatro, baile i presentashon di arte di palabra for di kultura urbano. E programa ta habrí pa artistanan ku ta aktivo den nan propio ambiente, pero ku no a haña fama ainda den e parti karibense òf e parti oropeo di Hulanda.
Pa kiko?
E supsidio ta destiná komo un kontribushon na e gastunan di bo tempu, material i servisionan di terseronan pa desaroyá i ehekutá e obra nobo. Bo por hinka gastunan pa produktonan manera un laptop òf mikrofon den e presupuesto, pero e Fondo no ta supsidiá esaki. Pero, por ehèmpel, hürmentu di un studio òf materialnan pa presentashonnan sí.
Kuantu?
Komo individuo bo por hasi petishon pa un máksimo di 15.000 euro. Pa konhuntonan i kolektivonan por hasi petishon pa un montante máksimo di 25.000 euro. Pa determiná e suma di e supsidio pa konhuntonan i kolektivonan nos ta wak, por ehèmpel, e kantidat di artista den e konhunto òf kolektivo.
Kon i ki ora por hasi petishon?
Bo por hasi petishon pa e supsidio akí durante henter aña, tanten ku e presupuesto di e Fondo ta sufisiente. Bo por risibí supsidio un total di dos biaha via e programa akí. Bo por entregá un petishon pa e Programa proyektonan urbano via Mi Fondo. Pa esaki bo mester di un kuenta komo “individuo.” Despues bo ta yena un formulario di registrashon.
Den e formulario di registrashon ta puntra ken bo ta komo artista, kiko bo a hasi kaba i kiko bo ke hasi awor (i ku ken). Tambe tin espasio pa añadí lenknan di bo produkshonnan (di músika) anterior òf otro ehèmpelnan di bo obra.
E Fondo ta evaluá denter di seis siman si e petishonario i e proyekto ta pas den e Programa proyektonan urbano. Si e evaluashon ta positivo lo tin un konsulta ku e empleadonan di e Fondo pa papia mas aleu tokante e proyekto. Despues un petishonario ta haña kuater siman di tempu pa desaroyá e plan. Despues di entregá e plan, e Fondo ta trata di duna resultado tokante e petishon denter di seis pa ocho siman (un máksimo di diestres siman).
Ta entregá un plan supstansial via Mi Fondo komo anekso den forma di pdf. Den e plan bo ta kontestá sinku pregunta ku ta aklará kiko eksaktamente bo ta bai hasi i kon bo ta bai ehekutá e plan:
- Kiko ta e resultado?
- Kon bo ta bai hasi esaki?
- Ken ta bo públiko i kon bo ta bai alkansá nan?
- Pa kiko bo ke usa e supsidio? Pa esaki bo ta traha un presupuesto.
- Bo tin imágennan òf oudio di e proyekto kaba?
Aki bo ta haña mas informashon tokante entrega di un petishon na Fonds Podiumkunsten.
Ta bon pa sa
- Urbano ta un nòmber kolektivo pa formanan kontemporaneo di músika, baile, i teatro ku ta wòrdu influensiá pa desaroyonan di siudat grandi òf sosial. E Fondo ke konektá mas tantu posibel na loke ta biba den e ambiente di artistanan i p’esei ta habrí pa diferente inisiativanan riba tereno urbano.
- Bo ta un artista nobo si ainda bo no tin hopi fama den e parti karibense òf parti oropeo di Hulanda. Ku artista nos ke men un persona ku ta hasi un presentashon òf konsierto, pero tambe un koreógrafo, produktor, kompositor òf eskritor di teksto ta inkluí den esaki. Komo artista bo a desaroyá bo mes identidat kaba i ku e proyekto bo ta bai dal un siguiente stap kla òf hasi algu nobo. E no ta un trayekto di investigashon. Artistanan por bini na remarke pa sosten den e programa komo konhunto tambe.
- A base di bo plan, bo ta traha pa yega na un resultado konkreto i públiko. Un resultado públiko por ta un presentashon, evento, konsierto, EP, lansamentu di albùm òf tour.
- Mester finalisá e proyekto di bo petishon denter di seis pa diesdos luna despues di e fecha di komienso di bo proyekto.
Bo por haña mas informashon tokante e kondishonnan, kriterionan di evaluashon i e informashon ku nos mester pa tratamentu di bo petishon via e boton aki bou riba e wèpsait di Fonds Podiumkunsten. E informashon akí ta disponibel na hulandes.
Preguntanan & kontakto
Bo tin pregunta tokante e areglo aki òf tin algu ku no ta kompletamente kla? Por fabor tuma kontakto ku e persona di kontakto riba e página aki.
