Proyekto Artista

Estudio i práktika di trabou 

• Un petishon por wòrdu entregá solamente pa artistanan ku: 
  • ta trahando un mínimo di 1 aña komo artista visual profeshonal i ta registrá na Kámara di Komèrsio, òf 
  • a sigui un estudio di hbo por lo ménos 3 aña pa bira artista visual i ta trahando un mínimo di 1 aña komo artista visual profeshonal, òf 
  • ta trahando 3 aña òf mas komo artista visual profeshonal. 

• No por usa Proyekto Artista pa kubri gastu di un estudio. Bo no por hasi uso di e areglo tampoko ora bo ta sigui enseñansa na institushonnan, manera estudionan di bachelor i master. Esaki ta konta tambe pa estudionan posakadémiko òf posdoktoral manera Rijksakademie, BAK, Ateliers, Jan van Eyck Academie i EKWC. 
• Pa por bini na remarke pa un kontribushon bo mester ta artístikamente aktivo den artenan visual i den e kapasidat ei ta inkorporá den e práktika di arte visual profeshonal na Hulanda i/òf e parti karibense di Reino. 

Gastunan ku por supsidiá

• E kontribushon no ta intenshoná pa trabounan pa un organisashon, trabounan regular, gastu di eksposishon i otro gastu di presentashon di trabou. 
• Gastunan regular, manera gastunan di alohamentu, no ta bini na remarke pa un kompensashon. 
• No por usa e kontribushon pa trese obra produsí anteriormente bèk den produkshon, pa hinka esaki den kuadro òf transferí esaki pa un otro superfisie. Por usa e kontribushon pa un buki di artista sí bou di kondishon ku e ta un publikashon speshal, ku por wòrdu konsiderá komo un obra di arte outónomo i ku tin un máksimo di tres ehemplar den sirkulashon. No por hasi petishon pa Proyekto Artista pa publikashonnan, pero por pidi un kontribushon pa Publikashon. 
• No por pidi e kontribushon pa un periodo di trabou den un studio di invitado den interior òf den eksterior si esaki wòrdu ofresé den e programa di Residency di Mondriaan Fonds.

Finansiamentu

• Ku un kontribushon fleksibel e intenshon ta ku bo mes kontribushon na e proyekto mester ta un mínimo di 10%. Esaki por ta un invershon propio, òf un kontribushon di terseronan, un fiansa liber di interes di Fonds Kwadraat òf un kontribushon via crowdfunding. 
• No tin un montante máksimo pa un kontribushon fleksibel, pero nos ta spera ku bo ta hasi tur esfuerso pa haña kofinansiamentu di terseronan. 
• Si un otro partido ta enbolbí den e petishon, manera un museo, galeria, negoshi òf dunadó di enkargo, e kontribushon finansiero di e partido akí mester ta den un proporshon aseptabel kompará ku e kontribushon ku ta pidi na Mondriaan Fonds. Ta spera di institushonnan kultural ku nan ta aseptá e Fair Practice Code. Esei ta nifiká outomátikamente ku e institushon ta pone e regla di tarifanan di artistanan den práktika. 

Petishonnan anterior 

• No por hasi petishon pa Proyekto Artista durante e durashon di un otro kontribushon finansiero di Mondriaan Fonds si e direktiva di e fondo ta di opinion ku e kontribushon ta kubri e mesun gastunan. 
• No por duna un kontribushon fiho na un artista ku a risibí un Komienso Artista (anteriormente Kontribushon pa Obra di Talento Hóben) ménos ku 1 aña pasá. 
• Por otorgá un kompensashon na un artista pa su tempu (invershon di tempu) denter di un periodo di 48 luna pa un máksimo di 24 luna. E ora ei den e periodo ku ta sobra, un petishonario por hasi un petishon solamente pa un kontribushon fleksibel pa e gastunan di e proyekto (komo parti di Proyekto Artista). 
• Si un petishon anterior a keda rechasá a base di prestashonnan artístiko, bo no por hasi petishon pa Proyekto Artista den un periodo di 12 luna despues di e fecha di petishon, ku eksepshon di un plan kompletamente diferente, di kua e ekspektativa ta ku bo ta tuma un otro ruta ku e desaroyo di bo obra.