Tokante e wèpsait akí

Rijkscultuurfondsen.org ta un wèpsait pa profeshonalnan di kultura riba e islanan ABCSSS. Un guia digital riba kual por haña un selekshon di e areglonan di e 6 fondonan di kultura di reino. For di aki bo ta bai ku kada klek den direkshon di e fondo ku ta pas mas mihó ku bo plannan.  

E wèpsait ta un inisiativa di e 6 fondonan di kultura di reino; Filmfonds, Fonds Podiumkunsten, Fonds voor Cultuurparticipatie, Mondriaan Fonds, Nederlands Letterenfonds i Stimuleringsfonds Creatieve industrie. Hopi di e areglonan di e fondonan di kultura di reino a keda desaroyá i ta disponibel pa institushonnan kultural i kreadornan den henter Reino. Debí na interkambio frekuente den e último añanan den forma di kòmbersashonnan, bishitanan di trabou bai bin, reakshonnan i akshonnan, e fondonan sa ku no ta tur ora ta fásil pa haña e areglo adekuá pa e proyekto adekuá si bo ta establesé na e islanan ABCSSS. E konseho ku e fondonan a haña tabata pa krea un lugá kla kaminda e kreadornan i e institushonnan di e parti karibense di Reino por haña nan kaminda pa e posibilidatnan di supsidio. E lugá ei ta e wèpsait akí. E fondonan ta yuda bo gustosamente. Bo ta bon biní.