Artistanan visual ku ta trahando profeshonalmente pa un mínimo di 1 te un máksimo di 4 aña.
Pa kiko?
Bo por usa e kontribushon pa desaroyá bo práktika di arte durante 1 aña. Pensa riba kreashon di obra, investigashon, eksperimento, kompra di material i aparatonan. Òf traha riba un enkargo òf partisipá na eksposishonnan i manifestashonnan den interior i den eksterior.
Kuantu?
€ 22.000 pa 12 luna.
Kon i ki ora por hasi petishon?
Por hasi petishon na kualke momentu di aña via e sistema di petishon online di Mondriaan Fonds. Riba e wèpsait bo por hasi petishon pa un kuenta, kual bo tin mester pa por entregá un petishon. Tene kuenta ku un periodo di tratamentu di 3 luna for di e momentu ku a entregá e petishon kompletu. No por otorgá un kontribushon ku forsa retroaktivo.
Aki bo ta haña mas informashon tokante entrega di un petishon na Mondriaan Fonds.
Ta bon pa sa
Bo ta aktivo profeshonalmente komo artista pa mas ku 4 aña? E ora ei Artista Básiko ta e areglo adekuá pa bo.
Si bo no ta sigur si bo ta bini na remarke pa un kontribushon Komienso Artista, e ora ei bo por tuma kontakto ku un empleado di Mondriaan Fonds.
Un otorgamentu Komienso Artista no ta inkluí solamente un kontribushon finansiero. Bo por sigui un trayekto di mèntòr i ta invitá bo pa partisipá na Prospects, un eksposishon di Mondriaan Fonds durante Art Rotterdam.
No mester entregá un presupuesto ku e petishon. Bo por usa e kontribushon na bo mes diskreshon na desaroyo di bo práktika.
Estudio ku kuríkulo di arte visual i práktika di trabou
Bo tin un mínimo di 1 te un máksimo di 4 aña trahando komo artista visual profeshonal.
Bo a finalisá un estudio di hbo bachelor ku un kuríkulo di arte visual? E ora ei e fecha di e diploma ta wòrdu konsiderá komo komienso di bo práktika profeshonal. Tin un periodo entre e fecha di e diploma di bo estudio di hbo bachelor ku un kuríkulo di arte visual i e komienso di bo estudio di master? E ora ei ta konta e periodo akí komo parti di e práktika profeshonal.
Bo no a finalisá un estudio di hbo bachelor ku un kuríkulo di arte visual? E ora ei ta konsiderá e momentu riba kual bo a presentá un obra pa promé biaha den e sirkuito di arte visual profeshonal komo e komienso di bo práktika profeshonal.
Bo ta artístikamente aktivo den artenan visual i den e kapasidat ei ta inkorporá den e práktika di arte visual profeshonal na Hulanda i/òf e parti karibense di Reino.
Bo no por usa Komienso Artista pa kubri gastu di un estudio. Bo no por hasi uso di e areglo tampoko ora bo ta sigui enseñansa na institushonnan, manera estudionan di bachelor i master. Esaki ta konta tambe pa estudionan posakadémiko òf posdoktoral. A ménos ku ta trata di un estudio partaim di ménos ku binti ora pa siman, ku no ta un bachelor.
Un periodo den kua e petishonario ta sigui un estudio di master no ta konta pa e durashon di práktika profeshonal.
Ta konsiderá partisipashon na un institushon di posakadémiko òf un estudio posdoktoral, manera Rijksakademie, Ateliers, Jan van Eyck Academie, BAK òf EKWC, komo parti di e práktika di trabou.
Periodonan den kua e petishonario a sigui un estudio no ta konta pa e periodo di práktika profeshonal. Un eksepshon ta konta pa partisipashon na programanan posakadémiko òf posdoktoral: ta konsiderá e periodonan akí sí komo parti di práktika di trabou.
Petishonnan anterior
Por otorgá bo un Komienso Artista un biaha so.
Un artista ku anteriormente a keda rechasá a base di e funshonamentu artístiko no por hasi petishon pa Komienso Artista durante un periodo di diesdos luna despues di e fecha di petishon.
No por hasi petishon pa un Komienso Artista durante e durashon di un otro kontribushon finansiero di Mondriaan Fonds si e direktiva di e fondo ta di opinion ku e kontribushon ta kubri e mesun gastunan.
Entrada kolektivo
Pa un Komienso Artista ta konta ku e entrada fiskal den e periodo pa kual ta hasi petishon no por ta mas haltu ku € 55.000.
Bo por haña mas informashon tokante e kondishonnan, kriterionan di evaluashon i e informashon ku nos mester pa tratamentu di bo petishon via e boton aki bou riba e wèpsait di Mondriaan Fonds. E informashon akí ta disponibel na hulandes i ingles.
